தமிழகத்தின் பிரபல தமிழ் தொலைக்காட்சியான Zee Tamil நடத்தி வரும் சரிகமப இசை நிகழ்ச்சியில் யாழ்ப்பாணத்தைச் சேர்ந்த கில்மிஷா முதலிடத்தைப் பெற்று சாதனை படைத்துள்ளார்.
28 போட்டியாளர்களுடன் ஆரம்பமான சரிகமப நிகழ்ச்சியில் இலங்கையிலிருந்து யாழ்ப்பாணத்தைச் சேர்ந்த கில்மிஷா மற்றும் மலையகத்தைச் சேர்ந்த அஷானி ஆகியோர் தெரிவாகி போட்டியில் கலந்துகொண்டனர்.
விறுவிறுப்பாக நடைபெற்று வந்த போட்டியில் யாழ்ப்பாணம்- அரியாலையைச் சேர்ந்த உதயசீலன் கில்மிஷா தனது திறமையை வெளிப்படுத்தி இறுதிப்போட்டிக்கு இரண்டாவதாகத் தெரிவாகியிருந்தார்.
இந்த நிலையில் இறுதிப்போட்டி நேற்று(17) சென்னை நேரு உள்ளக வியைாட்டரங்கில் கோலாகலமாக நடைபெற்றது.
இரண்டு சுற்று என்றவாறு நடைபெற்ற இறுதிப்போட்டியில் அனைவரையும் தனது குரலால் ஈர்த்து முதலிடம் பெற்று வெற்றிவாகை சூடினார் கில்மிஷா உதயசீலன். வரலாற்றில் முதன்முறையாக சரிகமப இசை நிகழ்ச்சியில் இலங்கைக்கு முதலிடம் பெற்றுக்கொடுத்த பெருமை கில்மிஷாவையே சாரும்.
நாட்டுக்குப் பெருமையைத் தேடிக்கொடுத்த கில்மிஷாவின் சாதனையை யாழ்ப்பாண மக்கள் கொண்டாடி வருவதோடு கில்மிஷாவுக்கு பலரும் தமது வாழ்த்துக்களையும் பாராட்டுக்களையும் தெரிவித்து வருகின்றனர்.
