சரிகமப இறுதிப்போட்டியில் வெற்றிபெற்ற கில்மிஷாவுக்கு ஜனாதிபதி ரணில் விக்கிரமசிங்க வாழ்த்துகளைத் தெரிவித்தார். தமிழகத்தின் பிரபல தமிழ் தொலைக்காட்சியான Zee Tamil நடத்தி வரும் சரிகமப இசை நிகழ்ச்சியில் இலங்கையிலிருந்து யாழ்ப்பாணத்தைச் சேர்ந்த கில்மிஷா மற்றும் மலையகத்தைச் சேர்ந்த அஷானி ஆகியோர் தெரிவாகி போட்டியில் கலந்துகொண்டனர்.
விறுவிறுப்பாக நடைபெற்று வந்த போட்டியில் யாழ்ப்பாணம்- அரியாலையைச் சேர்ந்த உதயசீலன் கில்மிஷா தனது திறமையை வெளிப்படுத்தி முதலிடம் பெற்று வெற்றிவாகை சூடினார். வரலாற்றில் முதன்முறையாக சரிகமப இசை நிகழ்ச்சியில் இலங்கைக்கு முதலிடம் பெற்றுக்கொடுத்தார் கில்மிஷா.
நாட்டுக்குப் பெருமையைத் தேடிக்கொடுத்த கில்மிஷாவுக்கு இன்று காலை அமைச்சரவை கூட்டம் முடிவுற்ற பின்னர் அமைச்சர் டக்ளஸ் தேவானந்தா ஊடாக ஜனாதிபதி தொலைபேசி மூலம் தொடர்பு கொண்டு தனது வாழ்த்துகளைத் தெரிவித்தார்.
