கண்டாவளை பிரதேச செயலாளர் பிரிவுக்குட்பட்ட சுண்டிகுளம் கடற்கரை செல்லும் பிரதான வீதி மற்றும் உள்ளக வீதிகள் நோயாளர் காவு வண்டி கூட செல்ல முடியாத நிலையில் சேதமடைந்து காணப்படுவதாகத் தெரிவித்துள்ளனர்.
தற்பொழுது பெய்த கடும் மழையாலும் குறித்த பகுதியில் தொடர்ச்சியாக நடைபெற்று வரும் சட்ட விரோத மணல் அகழ்வு காரணமாகவும் பிரதான வீதி மற்றும் உள்ளக வீதி அனைத்துமே மக்கள் பயன்படுத்த முடியாத நிலையில் குன்றும் குழியுமாகவும் காணப்படுகின்றது.
அவசர தேவை கருதி நோயாளர் காவு வண்டி கூட செல்ல முடியாத நிலையில் காணப்படுவதுடன் இப்பகுதிக்கான பேருந்து சேவையும் தற்பொழுது இடம்பெற முடியாமல் தொடர்ச்சியாக பேருந்துகள் பழுதடைந்து வருவதாகவும் அப்பகுதி மக்கள் தெரிவித்துள்ளனர்.
அது மட்டுமன்றி இப்பகுதியில் சுண்டைக்குளம் கடல் பகுதிக்கு மீன் தொழிலுக்காக செல்லும் மீனவர்கள் மற்றும் மீன் வியாபாரத்திற்காக செல்பவர்களும் தமது நாளாந்த ஜீவானோபாயத்தை மேற்கொள்ள முடியாத நிலையில் உள்ளதாகவும் தெரிவித்துள்ளனர்.
எனவே இது தொடர்பாக சம்பந்தப்பட்ட உரிய அதிகாரிகள் குறித்த பகுதியை நேரில் வந்து பார்வையிட்டு உரிய தீர்வினை பெற்றுத்தர வேண்டும் என அப்பகுதி மக்கள் கோரிக்கை விடுத்துள்ளனர்.
