கிளிநொச்சியில் காணாமல் போன சிறுமி மாத்தளையில்! கடத்தப்பட்டதாக வாக்குமூலம்!
கிளிநொச்சியில் காணாமல் போன சிறுமி மாத்தளையில் கண்டுபிடிக்கப்பட்டுள்ளார். கடந்த 17ம் திகதி கிளிநொச்சியைச் சேர்ந்த 15 வயதான சிறுமி ஒருவர் காணாமல் போயுள்ளதாக பொலிஸ் நிலையத்தில் முறைப்பாடு பதிவுசெய்யப்பட்டுள்ளது.
எனினும் பொலிஸார் கவனம் செலுத்தவில்லை என உறவினர்களால் குற்றம் சுமத்தப்பட்ட நிலையில் மாத்தளையிலிருந்து சிறுமி மீட்கப்பட்டுள்ளார்.
இரண்டு பெண்களின் உதவியுடன் நபர் ஒருவர் கடத்திச் சென்றதாகவும் தடுத்து வைக்கப்பட்டிருந்த இடத்திலிருந்து தப்பிச்சென்று பெற்றோருக்கு தொலைபேசியில் தகவல் தெரிவித்ததையடுத்து குடும்பத்தினர் பாதுகாப்பாக சிறுமியை அழைத்து வந்ததாக தெரிவிக்கப்படுகிறது.
சிறுமி வைத்திய பரிசோதனைக்காக கிளி மாவட்ட வைத்தியசாலையில் அனுமதிக்கப்பட்டுள்ளார். மேலும் சிறுமி வழங்கிய வாக்குமூலத்தின் அடிப்படையில் பொலிஸார் விசாரணைகளை மேற்கொண்டு வருகின்றனர் என தெரிவிக்கப்பட்டுள்ளது.
