அறிவுறுத்தலை மீறி தப்பிச்சென்றவர்கள் மீது பொலிஸார் துப்பாக்கிப் பிரயோகம்!
பொலிஸாரின் கட்டுப்பாட்டை மீறி தப்பிச் சென்றவர்கள் மீது பொலிஸார் சரமாரியாக துப்பாக்கிச்சூடு நடத்தியுள்ளனர்.
இச்சம்பவம் ஞாயிற்றுக்கிழமை மாலை La Courneuve (Seine-saint-Denis) நகரில் இடம்பெற்றுள்ளது. rue Paul Verlaine வீதியில் பொலிஸார் வீதி கண்காணிப்பில் ஈடுபட்டிருந்த போது மகிழுந்து ஒன்றை நிறுத்துமாறு பணித்துள்ளனர்.
எனினும் காவல்துறையினரின் கட்டுப்பாட்டை மீறி குறித்த மகிழுந்து அங்கிருந்து வேகமாக தப்பிச் செல்ல முற்பட்டது. இதனால் பொலிஸார் குறித்த மகிழுந்தை துரத்திச் சென்றனர்.
மகிழுந்து நிற்காமல் தொடர்ந்து பயணிக்க, அதனை நிறுத்துவதற்காக மகிழுந்தை நோக்கி பொலிஸார் சரமாரியாக துப்பாக்கிச்சூடு நடத்தினர்.பத்துக்கும் மேற்பட்ட தடவைகள் சுடப்பட்டு மகிழுந்து நிறுத்தப்பட்டது. மகிழுந்தில் நால்வர் பயணித்துள்ள நிலையில், நால்வரும் கைது செய்யப்பட்டனர்.
துப்பாக்கிச்சூடு தொடர்பில் காவல்துறையினரைக் கண்காணிக்கும் சிறப்பு படையினரான IGPN விசாரணைகளை மேற்கொண்டு வருகின்றனர்.
