பிரான்ஸ் கடற்கரையில் இளம்பெண் சடலமாக மீட்பு!
பிரித்தானியாவுக்குள் நுழையும் ஆசையில், பரிதாபமாக பலியாகியுள்ளார் இளம்பெண் ஒருவர். அவரை சட்டவிரோதமாக பிரித்தானியாவுக்குள் அனுப்ப முயன்ற ஒருவர் கைது செய்யப்பட்டுள்ளார்.
பிரான்ஸின் Calais பகுதியிலுள்ள கடற்கரையில், இளம்பெண் ஒருவரின் சடலம் கரையொதுங்கியுள்ளது.
அந்த 24 வயது இளம்பெண், எரித்ரியா நாட்டவர் என்பதும், அவர் பிரித்தானியாவுக்குள் நுழையும் முயற்சியில், சிறு படகொன்றில் பயணிக்கும்போது தண்ணீரில் விழுந்து உயிரிழந்திருக்கலாம் என்றும் கருதப்படுகிறது.
பிரித்தானியாவில் கைது செய்யப்பட்ட நபர்
இந்நிலையில், பிரித்தானியாவின் Dover பகுதியில், சூடான் நாட்டு இளைஞர் ஒருவர் கைது செய்யப்பட்டுள்ளார். அந்த 21 வயது இளைஞர், செவ்வாயன்று பிரித்தானியாவை அடைந்த சிறு படகொன்றை செலுத்தியவர் என்று கருதப்படுகிறது.
அவர் சட்டவிரோத புலம்பெயர்வோரை அந்த படகில் பிரித்தானியா அழைத்து வந்திருக்கலாம் என்றும், அவரது படகிலிருந்து தவறி விழுந்தே அந்த எரித்ரிய நாட்டவரான இளம்பெண் உயிரிழந்திருக்கலாம் என்றும் கருதப்படுவதைத் தொடர்ந்தே அவர் பிரித்தானியாவில் கைது செய்யப்பட்டுள்ளார்.
பிரான்ஸ் மற்றும் பிரித்தானிய பொலிசார் இந்த துயர சம்பவம் தொடர்பாக விசாரணை மேற்கொண்டுவருகிறார்கள்.
