தமிழர் பகுதியில் அரச வங்கியில் அடகுவைத்த 2 கோடி ரூபா பெறுமதியான தங்க நகைகள் மாயம்!
மட்டக்களப்பு ஓட்டமாவடியில் உள்ள அரச வங்கியொன்றில் இருந்து 2 கோடி ரூபாவிற்கும் அதிக பெறுமதியான தங்க நகை காணாமற்போயுள்ளதாக குற்றப் புலனாய்வு திணைக்களத்திற்கு முறைப்பாடு கிடைத்துள்ளதாக பொலிஸ் அதிகாரி ஒருவர் தெரிவித்துள்ளார்.
தங்க நகை கடனைப் பெறுவதற்காக அடமானம் வைத்த வாடிக்கையாளர் ஒருவர் வங்கிக்குச் சென்றபோது, தங்கம் அடங்கிய பொட்டலம் பெட்டகத்தில் இல்லை என்பது முதலில் தெரிய வந்ததாக அந்த அதிகாரி தெரிவித்தார்.
அந்த வங்கியின் முகாமையாளர் தலைமைக் காரியாலயத்திற்குச் செய்த முறைப்பாட்டின் பிரகாரம் அரச வங்கியின் மட்டக்களப்பு தலைமை அலுவலக அதிகாரிகள் மேற்கொண்ட ஆரம்பக்கட்ட உள்ளகப் பரிசோதனையின் போது, அடகு வைக்கப்பட்டுள்ள தங்கப் பொருட்களுடன் மேலும் பன்னிரெண்டு வாடிக்கையாளர்களின் தங்கப் பொருட்கள் அடங்கிய பொதிகளையும் காணவில்லை என மூத்த பொலிஸ் அதிகாரி தெரிவித்தார்.
2022 ஜனவரி முதல் டிசம்பர் வரை தங்க பாதுகாப்பு கடன் பெறுவதற்காக வாடிக்கையாளர்கள் வங்கியில் அடகு வைத்த தங்கப் பொருட்கள் காணாமற் போய்விட்டதாக புகார் மனுவில் கூறப்பட்டுள்ளது. அரச வங்கியின் மட்டக்களப்பு பிரதான காரியாலயத்தின் பிராந்திய முகாமையாளர், குறித்த தங்கம் கையிருப்பு காணாமற் போனமை தொடர்பில் குற்றப் புலனாய்வு திணைக்களத்தில் முறைப்பாடு செய்துள்ளதாக பொலிஸ் அதிகாரி தெரிவித்தார்.
வாடிக்கையாளர்கள் அடகு வைத்துள்ள தங்க நகை வைக்கப்பட்டிருந்த பெட்டகத்தின் இரண்டு சாவிகள் வங்கியின் இரண்டு அதிகாரிகளின் வசம் இருந்ததாகவும் புகாரில் தெரிவிக்கப்பட்டுள்ளது.
இரண்டு கோடி ரூபாவுக்கும் அதிக பெறுமதியான தங்கம் காணாமல் போனமை தொடர்பில் விசேட விசாரணைகளை ஆரம்பிக்க குற்றப் புலனாய்வு திணைக்களத்தின் விசேட குழுவொன்று மட்டக்களப்பு செல்லவுள்ளதாக சிரேஷ்ட பொலிஸ் அதிகாரி மேலும் தெரிவித்தார்.
