புத்தளம் மாவட்டம் – சிலாபம், சிங்கபுர பகுதியில் ஒரே குடும்பத்தைச் சேர்ந்த தாய், தந்தை மற்றும் மகள் கூரிய ஆயுதங்களால் குத்தியும், அடித்தும் கொல்லப்பட்டு வீட்டினுள் எரிக்கப்பட்டுள்ளதாக ஹலவத்த தலைமையகப் பொலிஸார் தெரிவித்துள்ளனர்.
இந்த சம்பவம் நேற்றிரவு (19-10-2024) இடம்பெற்றிருக்கலாம் என ஹலவத்த தலைமையக பொலிஸார் தெரிவித்தனர்.
இந்த சம்பவத்தில் தொழிலதிபரான 51 வயதுடைய எஸ். சேனாரத்ன, 44 வயதான மஞ்சுளா நிரோஷனி பண்டார, மற்றும் 15 வயதான ஏ. நேத்மி நிமேஷா ஆகியோரே கொடூரமாக கொலை செய்யப்பட்டுள்ளனர்.
சம்பவம் தொடர்பில் மேலும் தெரியவருவதாவது:-
இன்றைய தினம் காலை ஆறு மணியளவில், வீடு தீப்பிடித்து எரிவதாக நபரொருவர் ஹலவத்தை தலைமையக பொலிஸாருக்கு தகவல் தெரிவித்ததையடுத்து பொலிஸார் சென்று வீட்டினுள் எரிந்து கொண்டிருந்த சடலங்களை கண்டெடுத்துள்ளனர்.
பொலிஸாரின் மேலதிக விசாரணையில், சடலங்கள் கூரிய ஆயுதத்தால் தாக்கப்பட்டதுடன் கழுத்தை அறுத்திருந்தது தெரியவந்துள்ளது.
சம்பவம் தொடர்பில் ஹலவத்தை தலைமையக பொலிஸார் மேலதிக விசாரணைகளை மேற்கொண்டு வருகின்றனர்.
