யாழில் துப்பாக்கிச் சூடு, ஒருவர் காயம், 5 விசேட அதிரடிப் படையினர் கைது!
யாழ் தென்மராட்சி, வரணி, இடைக்குறிச்சிப் பகுதியில் விசேட அதிரடிப் படையினர் மேற்கொண்ட துப்பாக்கிச் சூட்டில் ஒருவர் கையில் காயமடைந்த நிலையில் சாவகச்சேரி வைத்தியசாலையில் அனுமதிக்கப்பட்டுள்ளார்.
குறித்த துப்பாக்கிச் சூட்டினை மேற்கொண்ட குற்றச்சாட்டில் பருத்தித்துறை முகாமைச் சேர்ந்த 5 விசேட அதிரடிப் படையினர் பொலிஸாரால் கைதுசெய்யப்பட்டுள்ளனர்.
வரணி இடைக்குறிச்சி பகுதியில் சட்டவிரோத கசிப்பு உற்பத்தி நிலையம் செயற்படுவதாக கிடைத்த தகவலையடுத்து அப்பகுதியை சோதனையிட்டபோது ஏற்பட்ட இழுபறியினையடுத்து விசேட அதிரடிப் படையினர் துப்பாக்கிச் சூட்டினை மேற்கொண்டதில் ஒருவர் கையில் காயமடைந்துள்ளார்.இச்சம்பவம் நேற்று இரவு நிகழ்ந்துள்ளது.
காயமடைந்தவர் சாவகச்சேரி வைத்தியசாலையில் அனுமதிக்கப்பட்டுள்ளார். கைதுசெய்யப்பட்டுள்ள விசேட அதிரடிப் படையினரை நீதிமன்றத்தில் முற்படுத்துவதற்கு நடவடிக்கை எடுத்துள்ளதாக பொலிஸார் தெரிவித்துள்ளனர். மேலதிக விசாரணைகளை பொலிஸார் மேற்கொண்டு வருகின்றனர்.
