பீரிஸ், டலஸ் உள்ளிட்ட மொட்டுவின்
13 எம்.பிக்கள் எதிரணி வரிசையில்!
சுயாதீனக் குழு என்று அவர்கள் அறிவிப்பு
நாடாளுமன்றத்தில் ஆளும் கட்சியில் அங்கம் வகிக்கும் ஸ்ரீலங்கா பொதுஜன பெரமுனவின் 13 உறுப்பினர்கள் சுயாதீனக் குழுவாக எதிரணி வரிசையில் இன்று அமர்ந்துள்ளனர்.
இதனை மொட்டுக் கட்சியின் தவிசாளரும் நாடாளுமன்ற உறுப்பினருமான ஜி.எல்.பீரிஸ், சபையில் இன்று பகிரங்கமாக அறிவித்தார்.
2022ஆம் ஆண்டுக்கான இடைக்கால வரவு – செலவுத் திட்டத்தின் இரண்டாம் வாசிப்பு மீதான விவாதம் இன்று நாடாளுமன்றத்தில் இடம்பெறுகின்றது.
இதன்போது, விசேட உரை ஒன்றை நிகழ்த்திய நாடாளுமன்ற பேராசிரியர் ஜீ.எல். பீரிஸ்,
“கடந்த காலங்களில் நெருக்கடிகளுக்கு முகங்கொடுத்ததைப் போன்றே தற்போது மீண்டு வருவதற்கான சக்தி மக்களிடம் உண்டென நம்புகின்றேன்.
அந்தக் காலங்களின் மக்கள் கருத்துக்குச் செவிசாய்க்கும் நாடாளுமன்றம் ஒன்று இருந்தது. நாட்டின் பொதுக் கருத்துக்கும் நாடாளுமன்றின் நிலைப்பாட்டுக்கும் பரஸ்பர வேறுபாடு உள்ளது.
இது சர்வதேச நாணய நிதியத்துடனான பேச்சிலும் சிக்கலை ஏற்படுத்தும்.
மக்கள் எம்மிடம் எதனையும் கோரவில்லை. எமது ஆட்சிக் காலத்தில் மக்களுக்கான சரியான வேலைத்திட்டங்களை நாமே முன்வைத்தோம்.
அதன் பிரதிபலிப்பாக எமக்கு நாடாளுமன்றில் மூன்றில் இரண்டு பெரும்பான்மை கிடைத்தது. எனினும், ஆளும் கட்சியின் சிலரது செயற்பாடுகளால் இன்று அது தலைகீழாக மாறியுள்ளது.
இன்று மக்கள் விரும்பும் ஒரு நாடாளுமன்றத்தை உருவாக்க அவர்களுக்கு வாய்ப்பளிக்க வேண்டும். மக்களுக்கான வாக்குரிமை மறுக்கப்படுவது மிக பாரதூரமானதாகும்.
எனவே, இவ்வாறானதொரு நிலைமையில் எமது கட்சியின் உறுப்பினர்கள் சிலர் எதிர்க்கட்சியில் சுயாதீன உறுப்பினர்களாக அமரத் தீர்மானித்துள்ளோம்.
இதன்படி, பேராசிரியர். ஜி.எல். பீரிஸ், டலஸ் அழகப்பெரும, பேராசிரியர் சன்ன ஜயசுமன, பேராசிரியர் சரித்த ஹேரத், கலாநிதி நாலக்க கொடஹேவா, குணபால ரத்ணசேகர, கலாநிதி உபுல் கலப்பத்தி, திலக் ராஜபக்ச, டிலான் பெரேரா, உதயன கிரிந்திகொட, வசந்த யாப்பா பண்டார, கே.பி.எஸ் குமாரசிறி மற்றும் லலித் எல்லாவல ஆகிய நாடாளுமன்ற உறுப்பினர்கள் சுயாதீன நாடாளுமன்ற உறுப்பினர்களாக எதிர்க்கட்சியில் அமரவுள்ளனர்.
எவ்வாறாயினும், மக்களுக்கு நன்மை பயக்கும் வேலைத்திட்டங்கள் முன்வைக்கப்படுமாயின் அதற்குத் தராளமாக எமது ஆதரவை வழங்குவோம்” – என்றார்.
