வரலாற்றில் முதன்முறையாக ஐந்து முன்னணி குற்றவாளிகள் ஒரே நேரத்தில் கைது – பொலிஸ்மா அதிபர் விளக்கம்
கொழும்பு | 28 ஆகஸ்ட் 2025
இந்தோனேசியாவில் ஐந்து ஒழுங்கமைக்கப்பட்ட குற்றவாளிகள் ஒரே நேரத்தில் கைது செய்யப்பட்டிருப்பது, வரலாற்றில் இதுபோன்ற நடவடிக்கை மேற்கொள்ளப்பட்ட முதல் முறையாகும் என பொலிஸ்மா அதிபர் பிரியந்த வீரசூரிய தெரிவித்துள்ளார்.
இன்று (28) காலை அரசாங்க தகவல் திணைக்களத்தில் நடைபெற்ற ஊடகவியலாளர் சந்திப்பில் உரையாற்றிய அவர், கைது செய்யப்பட்ட ஐந்து பேரும் தற்போது சர்வதேச பொலிஸாரின் (INTERPOL) சிவப்பு அறிவிப்பில் இருப்பதாகக் குறிப்பிட்டார்.
இலங்கை பொலிஸாரின் ஒருங்கிணைப்புடன், சர்வதேச பொலிஸாரின் ஆதரவுடன் இந்தோனேசிய பொலிஸாரால் குறித்த குற்றவாளிகள் கைது செய்யப்பட்டுள்ளதாகவும் அவர் விளக்கம் அளித்தார்.
மேலும்,
இலங்கையில் முன்னர் ஒழுங்கமைக்கப்பட்ட குற்றங்களில் அரசியல் ஈடுபாடு இருந்து வந்ததாகவும்,
தற்போது அந்த சூழல் மாறி, குற்றவாளிகளுக்கு அரசியல் பாதுகாப்பு இல்லாத நிலை உருவாகி வருவதாகவும் அவர் சுட்டிக்காட்டினார்.
பல சந்தர்ப்பங்களில் இலங்கையில் நடைபெற்ற குற்றங்கள் வெளிநாடுகளில் இருந்து வரும் குற்றவாளிகளால் வழிநடத்தப்பட்டதாகவும், இனி அரசியல் அழுத்தமின்றி சட்ட நடவடிக்கைகள் எடுக்கப்பட வேண்டும் என பொலிஸாருக்கு ஆலோசனை வழங்கப்பட்டுள்ளதாகவும் அவர் குறிப்பிட்டார்.
டுபாய், ஓமன், ரஷ்யா, பெலாரஸ் மற்றும் பிரான்ஸ் போன்ற நாடுகளிலும் ஒழுங்கமைக்கப்பட்ட குற்றவாளிகள் இருப்பதாகவும், அவர்களை எதிர்கொள்ளும் நடவடிக்கைகள் விரைவில் எடுக்கப்படும் என்றும் பொலிஸ்மா அதிபர் தெரிவித்தார்.
இந்நிலையில், இந்த நடவடிக்கையை வெற்றிகரமாக்க இந்தோனேசிய தூதரகத்தின் ஆதரவு மிக முக்கிய பங்கு வகித்ததாகவும், அதற்காக அவர் விசேட நன்றி தெரிவித்தார்.
—
Editor: கதிர்
