‘இறுதிவரை பேராடி மடிந்தவர் பிரபாகரன்’ டக்ளஸுக்கு பொன்சேகா பதிலடி!
இறுதிப் போரில் பிரபாகரன் சரணடையவில்லை. அவரை இராணுவத்தினர் உயிருடன் பிடிக்கவும் இல்லை. போர்க்களத்தில் அவர் இறுதிவரை போராடியே உயிரிழந்தார். என முன்னாள் இராணுவத் தளபதியும் நாடாளுமன்ற உறுப்பினருமான சரத் பொன்சேகா தெரிவித்துள்ளார்.
தமிழீழ விடுதலைப் புலிகளின் தலைவர் பிரபாகரன் போரின் இறுதிக்கட்டத்தில் சரணடைந்த பின்னர் உயிரிழந்தார் என கடற்தொழில் அமைச்சர் டக்ளஸ் தேவானந்தா நிகழ்வொன்றில் தெரிவித்திருந்தார். இந்த கருத்து தொடர்பில் ஊடகவியலாளர்கள் கேட்டபோதே அவர் இவ்வாறு தெரிவித்துள்ளார்.அவர் மேலும் தெரிவிக்கையில்.
“பிரபாகரனின் சாவினை வைத்து அன்று தொடக்கம் இன்றுவரை பலர் அரசியல் செய்து வருகின்றனர். இராணுவத்தினருடனான நேரடி மோதலில் பிரபாகரன் உயிரிழந்தார் என்பது தான் உண்மை. அவரின் சடலத்தினையே இராணுவத்தினர் மீட்டனர். பிரபாகரன் ஒரு பயங்கரவாத குழுவின் தலைவர். எனினும் அவர் சிறந்த போர்வீரன். அதனால் அவர் மீது எனக்குத் தனி மரியாதை உண்டு.
பிரபாகரனை உயிருடன் பிடிக்கவேண்டும் என இந்தியா உட்பட சில நாடுகள் விரும்பின. அந்த நாடுகள் இலங்கை அரசுக்கு அழுத்தமும் கொடுத்தன. எனினும் பிரபாகரன் எந்த ஒரு தரப்பினரிடமும் சிக்கவில்லை. அவர் இறுதிவரை போராடிய மரணித்தார்” என்று தெரிவித்துள்ளார்.
