பிரான்ஸில் கல்விச் செயற்பாடுகளை பாதிக்கும் வெடிகுண்டு அச்சுறுத்தல்!
Val-de-Marne மாவட்டத்தில் உள்ள பாடசாலைகளுக்கு வெடிகுண்டு அச்சுறுத்தல் விடுக்கப்பட்டதை அடுத்து, இன்று வெள்ளிக்கிழமை காலை மூன்று பாடசாலைகளைச் சேர்ந்த மாணவர்கள் வெளியேற்றப்பட்டனர்.
Vitry-sur-Seine, Chennevières-sur-Marne மற்றும் Creteil ஆகிய நகரங்களில் உள்ள மூன்று பாடசாலைகளுக்கு இன்று வெள்ளிக்கிழமை காலை வெடிகுண்டு அச்சுறுத்தல் விடுக்கப்பட்டிருந்தது. அதையடுத்து பாடசாலை மாணவர்கள், ஆசிரியர்கள் என அனைவரும் வெளியேற்றப்பட்டு, பாடசாலை முழுவதுமாக சோதனையிடப்பட்டது. ஆனால் பாடசாலைகளில் வெடிகுண்டு எதுவும் கிடைக்கவில்லை.
இல்து பிரான்சுக்குள் அண்மையில் பல பாடசாலைகளில் வெடிகுண்டு அச்சுறுத்தல் விடுக்கப்படுவது அதிகரித்துள்ளது. வெடிகுண்டு அச்சுறுத்தல் காரணமாக பிரான்ஸில் கல்விச் செயற்பாடுகள் பெரிதும் பாதிக்கப்படுவதாக சமூக ஆர்வலர்கள் கவலை தெரிவித்துள்ளனர்.
