களுத்துறையில் பாடசாலை மாணவி ஒருவர் உயிரிழந்தமை தொடர்பில் கைது செய்யப்பட்ட பிரதான சந்தேகநபர் எதிர்வரும் 26 ஆம் திகதி வரை விளக்கமறியலில் வைக்கப்பட்டுள்ளார்.
48 மணித்தியால தடுப்புக்காவல் விசாரணையின் பின்னர் களுத்துறை நீதவான் முன்னிலையில் சந்தேகநபர் ஆஜர்படுத்தப்பட்ட போதே விளக்கமறியல் உத்தரவு பிறப்பிக்கப்பட்டுள்ளது.
சம்பவம் தொடர்பான விசாரணை குற்றப் புலனாய்வு திணைக்களத்திடம் ஒப்படைக்கப்பட்டுள்ளது.
சம்பவத்தில் மறைக்கப்பட்டுள்ள அனைத்து விடயங்களையும் விரைவில் வௌிக்கொணரும் நோக்கில் இந்த நடவடிக்கை எடுக்கப்பட்டுள்ளதாக பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் சட்டத்தரணி நிஹால் தல்தூவ தெரிவித்தார்.
உயிரிழந்த மாணவி தங்கியிருந்த ஹோட்டலை நடாத்திச் செல்லும் உரிமையாளரின் மனைவி நேற்று(11) கைது செய்யப்பட்டார்.
கட்டுகுருந்த பகுதியைச் சேர்ந்த 48 வயதான பெண்ணொருவரே கைது செய்யப்பட்டதாக பொலிஸ் ஊடகப் பேச்சாளர் குறிப்பிட்டுள்ளார்.
இதேவேளை, குறித்த மாணவியை ஹோட்டலுக்கு அழைத்துச் சென்ற நண்பியும் அவரின் காதலரும் ஏற்கனவே கைது செய்யப்பட்டுள்ளமை குறிப்பிடத்தக்கது.
