யாழ். தொடக்கம் அம்பாந்தோட்டை வரை பயங்கரவாதத் தடுப்புச் சட்டத்துக்கு எதிரான கையெழுத்துப் போராட்டம்- நாளை காலை ஆரம்பம்
கொடூரமான பயங்கரவாதத் தடுப்புச் சட்டத்தை இரத்துச் செய்யக் கோரி நாடளாவிய ரீதியில் கையெழுத்துத் திரட்டும் பிரசார நடவடிக்கை யாழ். காங்கேசன்துறை தொடக்கம் அம்பாந்தோட்டை வரை நாடு முழுவதும் நடத்தப்படுகின்றது.
நாளை (10) ஆரம்பமாகும் இந்நிகழ்வில் திரண்டு பங்களிக்க மக்களுக்கு அழைப்பு விடுக்கப்பட்டுள்ளது.
இதற்கான அழைப்பை இலங்கைத் தமிழரசுக் கட்சி வாலிபர் முன்னணியின் சார்பில் கி. சேயோன், சர்வ ஜன நீதி அமைப்பின் சார்பில் ம.ஆ.சுமந்திரன் எம்.பி., தொழிற்சங்கங்கள் மற்றும் வெகுஜன அமைப்புக்களின் கூட்டமைப்பு சார்பில் ஜோசப் ஸ்டாலின் ஆகியோர் கூட்டாக விடுத்துள்ளனர்.
இதையொட்டி அவர்கள் விடுத்துள்ள ஊடக அறிக்கையில்,
“1979 ஆம் ஆண்டு, 6 மாதங்களுக்கு ஒரு தற்காலிக ஏற்பாடுகள் சட்டமாககே கொண்டுவரப்பட்டு, 40 ஆண்டுகளுக்கும் மேலாக தொடர்ந்தும் அமுலிலுள்ள கொடூரமான பயங்கரவாதத் தடுப்புச் சட்டத்தை இரத்துச் செய்யக் கோரி நாடளாவிய ரீதியில் கையெழுத்துத் திரட்டும் பிரசார நடவடிக்கையை நாம் ஆரம்பித்துள்ளோம்.
அன்றைய அரசுக்கு எதிரான அதிருப்தியை நசுக்குவதற்கு இந்தச் சட்டம் பயன்படுத்தப்பட்டதை நாம் கண்டோம்.
இது கடந்த காலங்களில் தொடர்ந்ததைப் போலவே இன்றும் தொடர்கின்றது. குறிப்பாக தற்போது காலிமுகத்திடல் அஹிம்சை வழிப் போராட்டக்காரர்களைக் கைதுசெய்யவும் இந்தச் சட்டமே பயன்படுத்தப்படுகின்றது.
இதற்கு எதிரான கையெழுத்துத் திரட்டும் பிரசார நடவடிக்கை நாளை (10.09.2022) காலை 9 மணிக்கு யாழ். மாவிட்டபுரம் கந்தசாமி கோயிலிலிருந்து ஆரம்பமாகும்.
காங்கேசன்துறை தொடக்கம் அம்பாந்தோட்டை வரையாக நடைபெறவுள்ள நாடு தழுவிய இந்த ஊர்தி வழிப் போராட்டம் பயங்கரவாதத் தடுப்புச் சட்டதை இரத்துச் செய்வதாக அரசு கொடுத்த வாக்குறுதியை நிறைவேற்றக் கோரி வலியுறுத்தும்.
நாளை ஆரம்ப நிகழ்வில் கலந்துகொள்ளுமாறு அனைவரையும் அன்புடன் அழைக்கின்றோம்.
தயவாக எங்களுடன் சேர்ந்து, இந்தப் பயங்கரவாதத் தடுப்புச் சட்டத்தை இரத்துச் செய்வதற்கான மனுவில் கையெழுத்திடுங்கள்” – என்றுள்ளது.
