கோட்டாபய ராஜபக்க்ஷ சாட்சியமளிக்கத் தயாராக இருப்பதாக அறிவிப்பு – யாழ்ப்பாணத்தில் அல்ல, கொழும்பில்
முன்னாள் ஜனாதிபதி கோட்டாபய ராஜபக்க்ஷ, 2011 ஆம் ஆண்டு காணாமல் போன மனித உரிமை செயற்பாட்டாளர்களான லலித் வீரராஜ் மற்றும் குகன் முருகானந்தன் ஆகியோரின் வழக்கில் சாட்சியமளிக்கத் தயாராக உள்ளதாக உச்ச நீதிமன்றத்தில் தெரிவித்துள்ளார்.
எனினும், யாழ்ப்பாணம் நீதிமன்றத்தில் ஆஜராக முடியாது என்றும், கொழும்பில் சாட்சியமளிக்கத் தயார் என்றும் அவரது சட்டத்தரணி தெரிவித்தார்.
—
⚖️ வழக்கின் பின்னணி
2019 ஆம் ஆண்டு, காணாமல் போன இருவரின் குடும்பத்தினர் ஹேபியஸ் கோர்ப்பஸ் மனு ஒன்றை யாழ்ப்பாணம் நீதிவான் நீதிமன்றத்தில் தாக்கல் செய்தனர்.
இந்த வழக்கில் சாட்சியமளிக்க கோட்டாபய ராஜபக்க்ஷவுக்கு சம்மன் அனுப்பப்பட்ட நிலையில், பாதுகாப்பு காரணங்களை மேற்கோள் காட்டி அவர் மேன்முறையீட்டு மனு ஒன்றை தாக்கல் செய்தார்.
மேன்முறையீட்டு நீதிமன்றம் யாழ்ப்பாணத்தில் ஆஜராக தேவையில்லை என தீர்ப்பளித்த நிலையில், அந்தத் தீர்ப்பை ரத்து செய்யக்கோரி மனுதாரர்கள் உச்ச நீதிமன்றத்தில் மேன்முறையீட்டு மனு தாக்கல் செய்தனர்.
—
⚖️ உச்ச நீதிமன்றத்தின் தீர்மானம்
இந்த வழக்கு விசாரணையின் போது, ஜனாதிபதி சட்டத்தரணி ரொமேஷ் டி சில்வா, கோட்டாபய ராஜபக்க்ஷ சாட்சியமளிக்கத் தயாராக இருப்பதைத் தெரிவித்தார். ஆனால் யாழ்ப்பாணம் செல்ல முடியாது எனவும், கொழும்பில் சாட்சியமளிக்க விருப்பம் உள்ளதாகவும் தெரிவித்தார்.
இதையடுத்து, நீதிபதிகள் யசாந்த கோடகொட, குமுதுனி விக்ரமசிங்க, ஷிரான் குணரத்ன ஆகியோரால் அமையப்பட்ட மூவர் அமர்வு, நான்கு வாரத்திற்குள் யாழ்ப்பாண நீதிமன்றத்தில் உரிய கோரிக்கை தாக்கல் செய்ய ஆணை பிறப்பித்தது.
மனுதாரர்கள் சார்பில் ஆஜராகிய சட்டத்தரணி நுவன் போபகே, இந்த கோரிக்கைக்கு இணக்கம் தெரிவித்து வழக்கு முடிவுக்கு கொண்டு வரப்பட்டது.
