திருகோணமலையில் குடியேறும் தாய்லாந்து புத்தர்!
திருகோணமலை நகரில் தொல்பொருள் திணைக்களத்தால் ஆக்கிரமிக்கப்பட்ட இடத்தில் புத்தர் சிலை ஒன்று நாளை மறுதினம் ஞாயிற்றுக்கிழமை நிர்மாணிக்கப்படவுள்ளதாக தெரிவிக்கப்பட்டுள்ளது.
நான்கு அடி உயரம் கொண்ட இந்த புத்தர் சிலையானது திருகோணமலை நகரில் உள்ள நெல்சன் திரையரங்குக்கு முன்னால் நிறுவப்பட ஏற்பாடாகியுள்ளது.
2ஆயிரத்து 700 ஆண்டுகளுக்கு முன்னர் தாய்லாந்தில் இருந்து திருகோணமலைக்கு வந்து இறங்கியதாக கூறப்படும் பிக்குகளை நினைவு கூரும் முகமாக இந்த புத்தர் சிலை நிறுவப்படவுள்ளதாக தெரிவிக்கப்பட்டுள்ளது.
மேலும், இந்த நிகழ்விற்காக தாய்லாந்தில் இருந்து குறித்த புத்தர் சிலையோடு 50 பிக்குகள் நாளை இலங்கை வரவுள்ளதாகவும் இவர்கள் தங்குவதற்காக நிலவெளியில் உள்ள விடுதி ஒன்றில் ஏற்பாடு செய்யப்பட்டுள்ளதாகவும் தெரிவிக்கப்பட்டுள்ளது.
ஞாயிற்றுக்கிழமை காலை 7.30 மணியளவில் கடற்படை தளத்திற்கு சென்று காந்தி சுற்றுவட்டப் பகுதியில் கடல் வழியாக பிக்குகள் வந்து இறங்கிய பின்னர் பாதயாத்திரையாக குறித்த இடத்திற்கு செல்லவுள்ளனர்.
அங்கு தாய்லாந்தில் இருந்து அவர்களால் கொண்டு வரப்படுகின்ற 4 அடி உயரமான புத்தர் சிலையை வைத்து ஒரு மணித்தியாலம் பிரித் நிகழ்வு இடம்பெறும் எனவும் தெரிவிக்கப்பட்டுள்ளது.
இந்த நிலையில், குறித்த இடத்தில் பெளத்த சிலையோ வேறு நிர்மாணிப்புக்கோளா மேற்கொள்ளவில்லை எனவும் சமய ஆசீர்வாதம் மாத்திரமே நடைபெறவுள்ளதாகவும் திருகோணமலை அரசாங்க அதிபர் தெரிவித்துள்ளமை குறிப்பிடத்தக்கது.
