தாய்லாந்து பிரதமர் பேடோங்டர்ன் ஷினவத்ரா பதவி நீக்கம்
தாய்லாந்து பிரதமராக இருந்த பேடோங்டர்ன் ஷினவத்ரா (Paetongtarn Shinawatra), இன்று (29) தாய்லாந்து அரசியலமைப்பு நீதிமன்றத்தால் பதவியில் இருந்து நீக்கப்பட்டார்.
இவர் தாய்லாந்தின் முன்னாள் பிரதமர் தக்ஸின் ஷினவத்ராவின் (Thaksin Shinawatra) மகளாவார்.
பேடோங்டர்ன் 2024 ஓகஸ்ட் முதல் பிரதமராக பதவி வகித்து வந்தார்.
இவர் பதவி நீக்கத்திற்கு காரணம், கம்போடியாவின் முன்னாள் தலைவர் ஹுன் சென்னுடன் (Hun Sen) நடைபெற்ற தொலைபேசி உரையாடல் கசிந்ததை அடுத்து பதவி நீக்கம் செய்யப்பட்டார்.
இந்த உரையாடலில், தாய்லாந்து மற்றும் கம்போடியா இடையேயான எல்லைப் பிரச்சினை குறித்து பேசப்பட்டதாகவும், இது தாய்லாந்தின் தேசிய நலனுக்கு எதிரானதாகவும் குற்றச்சாட்டு எழுந்தது.
இதனைத் தொடர்ந்து, பேடோங்டர்ன் நாட்டின் நலன்களைப் பாதுகாக்கத் தவறியதாகவும், அரசியலமைப்பு விதிகளை மீறியதாகவும் குற்றம் சாட்டப்பட்டு, 2025 ஜூலை 1 முதல் பிரதமர் பதவியில் இருந்து இடைநீக்கம் செய்யப்பட்டிருந்தார்.
இறுதியாக, இன்று நீதிமன்றம் அவரை பதவியில் இருந்து முறையாக நீக்கியது.
இந்த தீர்ப்பு தாய்லாந்தில் மேலும் அரசியல் நிலையற்ற தன்மையை ஏற்படுத்தியுள்ளது.
பேடோங்டர்னின் பதவி நீக்கத்துடன், அவரது அமைச்சரவையும் கலைக்கப்பட்டு, புதிய தலைவரை தேர்ந்தெடுக்க பாராளுமன்றம் கூடவுள்ளது.
ஷினவத்ரா குடும்பத்தைச் சேர்ந்த நான்காவது நபராக பேடோங்டர்ன் இவ்வாறு பதவியில் இருந்து நீக்கப்பட்டுள்ளார்.
இவருக்கு முன், அவரது தந்தை தக்ஸின் ஷினவத்ரா (2006-ல் இராணுவப் புரட்சியால்), மாமனார் சோம்சாய் வோங்சவத் (2008-ல் நீதிமன்ற தீர்ப்பால்), மற்றும் அத்தை யிங்லக் ஷினவத்ரா (2014-ல் நீதிமன்ற தீர்ப்பு மற்றும் இராணுவப் புரட்சியால்) ஆகியோர் பதவி நீக்கப்பட்டனர்.
