புலிகளிலிருந்து பிரிந்தபோது ஜே.வி.பி. ஆயுதம் வழங்கியது என்கிறார் பிள்ளையான்!
ஜே.வி.பியால் ஆயுதங்கள் வழங்கப்பட்டதாக இராஜாங்க அமைச்சர் பிள்ளையான் எனப்படும் சிவனேசதுரை சந்திரகாந்தன், மக்கள் விடுதலை முன்னணியின் தலைவர் அநுரகுமார திசாநாயக்கவை நோக்கி கூறியுள்ளார்.
நாடாளுமன்றத்தில் நேற்றைய தினம் உயிர்த்த ஞாயிறு குண்டு தாக்குதல் மற்றும் தேசிய பாதுகாப்பு தொடர்பான இரண்டாம் நாள் விவாதம் இடம்பெற்றிருந்தது.
இந்தச் சந்தர்ப்பத்தில் பிள்ளையானுக்கும், அநுரவுக்கும் இடையில் கருத்து மோதல்கள் இடம்பெற்றிருந்தன.
பிள்ளையான் உரையாற்றுகையில், மக்கள் விடுதலை முன்னணியின் தலைவர் அநுரகுமார திசாநாயக்க எனது பெயரை குறிப்பிட்டு கருத்து தெரிவித்தார். அரசியலுக்காக நீங்கள் எதனையும் பேசலாம். ஆனால் நீங்கள் ஒருவிடயத்தை மறந்திருக்க மாட்டீர்கள் என்று நம்புகின்றேன். நீங்களும் அரசியல் செய்யும் காலத்தில் நாங்கள் தமிழீழ விடுதலைப் புலிகள் அமைப்பில் இருந்து பிரிந்து வந்த போது உங்களுடைய அமைப்பால் ஆயுதங்கள் வழங்கப்பட்டன.
அப்படியென்றால் நீங்கள் உங்கள் அமைப்பிலிருந்த பிணையில் விடுவிக்கப்பட்ட மகன்மார்களுக்கு உங்களின் பழைய துப்பாக்கிகள், வெடி குண்டுகளை கொடுத்திருக்க முடியாதா? என கேள்வி எழுப்பியுள்ளார்.
இதற்கு அநுரகுமார திசாநாயக்க பதிலளிக்கையில், தமிழீழ விடுதலை புலிகளுக்கு நாங்கள் ஆயுதங்கள் வழங்கியதாக கூறுவதை முற்றாக நிராகரிக்கின்றோம். அது தவறான கருத்து என்றார்.
