ராஜபக்சாக்களால் தமிழர்களின் மனதை வெல்ல முடியாது.தமிழர்களால் விரட்டப்படுவர்!
மஹிந்த ராஜபக்சவினாலோ, கோத்தபாய ராஜபக்சவினாலோ தமிழ் மக்களின் மனதில் இடம்பிடிக்க முடியாது. தமிழ் மக்களின் இடங்களிற்கு சென்றால் விரட்டியடிக்கப்படுவர் என சரத் பொன்சேகா தெரிவித்துள்ளார்.
பிரதமர் மஹிந்த ராஜபக்ச யாழ்ப்பாணத்திற்கு வருகை தந்த போது மக்கள் எதிர்ப்பு போராட்டங்களில் ஈடுபட்டமை குறித்து கருத்து தெரிவிக்கும் போதே அவர் இவ்வாறு தெரிவித்துள்ளார். அவர் மேலும் தெரிவிக்கையில்:-
‘2010 தேர்தலின் போது மஹிந்த ராஜபக்சவை தமிழர்கள் வெறுத்து விட்டனர். அந்த தேர்தலில் யாழ்ப்பாணத்தில் மட்டுமல்ல வடக்கிலும் எனக்கே அதிக வாக்கு கிடைத்தது. அதற்காக நான் என்றும் நன்றி உடையவனாக இருப்பேன்.
யாழ்ப்பாண மக்களின் மனதை வெல்ல வேண்டும் என்பதற்காகத் தான் மஹிந்த ராஜபக்ச அங்கு சென்றார். எனினும் மக்கள் வீதிகளில் போராடி விரட்டியடித்துள்ளனர். யாழ் மக்களின் மனதையோ வடக்கு கிழக்கு மக்களின் மனதையோ அல்லது ஒட்டுமொத்த தமிழ் மக்களின் மனதையோ ராஜபக்சாக்களால் ஒருபோதும் வெல்லவே முடியாது’ என்று தெரிவித்துள்ளார்.
