பன்னிப்பிட்டிய ஹிரிபிட்டிய, போகஹவில பிரதேசத்தில் உள்ள வீடொன்றின் மேல் மாடியிலிருந்து கீழே தவறி விழுந்து கட்டடப் பொறியாளர் ஒருவர் உயிரிழந்துள்ளதாக ஹோமாகம தலைமையக பொலிஸார் தெரிவித்தனர்.
பன்னிப்பிட்டிய ஹிரிபிட்டிய, போகஹவில பிரதேசத்தைச் சேர்ந்த 41 வயதுடைய இரண்டு பிள்ளைகளின் தந்தையே உயிரிழந்துள்ளார்.
இது தொடர்பில் மேலும் தெரியவருவது,
உயிரிழந்தவர் தனது இரண்டு மாடி வீட்டில், நீர் கசிந்துள்ள இடங்களில் கூரைத் தகடுகளை சரி செய்து கொண்டிருந்த போது இருபத்தைந்து அடி உயரத்தில் இருந்து கீழே தவறி விழுந்து காயமடைந்துள்ளார்.
இந்நிலையில், கட்டடப் பொறியாளர் கீழே வீழ்ந்து கிடப்பதை கண்ட அயல் வீட்டு பெண் ஒருவர் இது தொடர்பில் கட்டடப் பொறியியலாளரின் மனைவியிடம் தெரிவித்துள்ளார்.
இதனையடுத்து, காயமடைந்தவர் ஹோமாகம ஆதார வைத்தியசாலைக்கு கொண்டு செல்லப்பட்ட போது, அவர் ஏற்கனவே உயிரிழந்துவிட்டதாக வைத்தியர்கள் தெரிவித்துள்ளனர்.
