கட்டு துப்பாக்கி வெடித்ததில் பொலிஸ் அலுவலர் ஒருவர் படுகாயமடைந்துள்ளார் என்று பொலிஸார் தெரிவித்துள்ளனர்.
தருமபுரம் பொலிஸ் நிலையத்தில் கடமையாற்றும் 37 வயதுடைய பொலிஸ் உத்தியோகத்தர் ஒருவரே இவ்வாறு காயமடைந்துள்ளார்.
தருமபுரம் பொலிஸ் பிரிவுக்குற்ப்பட்ட புளியம்பொக்கணை கோரமோட்டை பகுதியில் இன்றையதினம் (01.02.2023) சட்டவிரோத கசிப்பு உற்பத்தி இடம் பெறுவதாக கிடைக்கப்பெற்ற தகவலுக்கு அமைவாக தருமபுரம் பொலிஸார் அப்பகுதிக்கு விரைந்தனர்.
அதனையடுத்து குறித்த பகுதியில் சட்டவிரோதமாக கசிப்பு உற்பத்தியில் ஈடுபட்ட சந்தேகநபரை கைது செய்ய முற்பட்ட வேளை சந்தேகநபர் அங்கிருந்து தப்பிச்சென்றுள்ளார்.
அவரைக் கைது செய்யும் நோக்கில் துரத்திச் சென்ற பொழுது மிருக வேட்டைக்காக வைக்கப்பட்டிருந்த கட்டுத் துப்பாக்கி வெடித்ததில் பொலிஸ் உத்தியோகத்தர் ஒருவர் படுகாயமடைந்தார்.
படுகாயமடைந்த உத்தியோகத்தர் தருமபுர வைத்தியசாலையில் அனுமதிக்கப்பட்டு மேலதிக சிகிச்சைக்காக கிளிநொச்சி பொது வைத்தியசாலைக்கு மாற்றப்பட்டுள்ளார்.
இச்சம்பவம் தொடர்பாக தருமபுரம் பொலிஸார் மேலதிக விசாரணைகளை முன்னெடுத்து வருகின்றனர்.
