இந்து ஆலய விக்கிரக திருட்டில் படைத்தரப்பிற்குத் தொடர்பு!
அண்மைய நாட்களில் யாழ்ப்பாணத்தில் இந்து ஆலயங்களில் விக்கிரகங்கள் பல திருடப்பட்டிருந்தன. இந்த திருட்டு சம்பவத்துடன் பாதுகாப்பு தரப்பினருக்கும் தொடர்புகள் இருப்பது விசாரணைகளில் தெரியவந்துள்ளது.
வலிவடக்கு பகுதியில் இராணுவத்தினரின் கட்டுப்பாட்டில் உள்ள பகுதிகளில் உள்ள இந்து ஆலயங்களின் விக்கிரகங்கள் இராணுவத்தினர் மற்றும் கடற்படை புலனாய்வாளர்களின் உதவியுடன் விக்கிரகங்கள் திருடப்பட்டுள்ளமை விசாரணைகளில் தெரியவந்துள்ளது.
விக்கிரக திருட்டு தொடர்பில் மாவிட்டபுரம் நல்லிணக்கபுரத்தைச் சேர்ந்த 24 வயதான இளைஞர் ஒருவர் கைதுசெய்யப்பட்டார். இதனையடுத்து நவக்கிரியைச் சேர்ந்த 25 வயதான இளைஞன் ஒருவரும் கைதுசெய்யப்பட்டு விசாரணை முன்னெடுக்கப்பட்டது.
விசாரணைகளில் திருடப்பட்ட விக்கிரகங்கள் கொழும்பில் விற்கப்பட்டமை தெரியவந்ததையடுத்து கொழும்பு சென்ற விசேட பொலிஸ் குழு திருடப்பட்ட 20 விக்கிரகங்களை மீட்டுள்ளனர். விக்கிரக திருட்டில் மூன்று இராணுவத்தினர் மற்றும் கடற்படை புலனாய்வுப் பிரிவைச் சேர்ந்த ஒருவருக்கும் தொடர்பு உள்ளமை விசாரணைகளில் தெரியவந்துள்ளது.
திருட்டில் தொடர்புடைய இராணுவத்தினர் மற்றும் கடற்படை புலனாய்வுப் பிரிவைச் சேர்ந்தவரையும் கைது செய்வதற்கு நடவடிக்கை எடுத்துள்ளதாக பொலிஸார் தெரிவித்துள்ளனர்.
